jeep 101

noong nakaraang biyernes, nasa u.p. ako at patungo ng sm north. minalas-malas pa 'ko sa paghihintay ng dyip dahil inabot ako ng mga isang oras sa kakahintay ng masasakyang dyip. maulan-ulan pa naman. pero 'di bale, nakasakay rin naman ako at naging kampante na dahil ilang sandali na lang makakarating rin ako ng sm. pero hindi naging ganun kasimple ang mga pangyayari... dahil bago pa man ako makarating ng sm north, eh muntik pa akong manakawan ng isang pangit na lalaki. gusto mo malaman ang kwento? ilalahad ko dito.

may lalaking sumakay na pinagpilitan pa niya yung pwet niyang malaki sa tabi ko. maya-maya, habang nasa loob pa ng u.p. ang dyip, napatingin ako sa bag ko at nakita ko ang kamay niya na papasok sa bag ko. ang mali ko naman kasi nakabukas yung bag ko. at sa sandaling napansin niyang nakita ko kamay niya, tinanggal niya. agad kong sinara ang bag ko. tinitigan siya ng matagal sa mata. napatingin sa'kin pero hindi ko tinanggal 'yung tingin ko. sa loob-loob ko gusto ko ng batukan. kaya lang nag-atubili ako dahil baka may panaksak. natatawa na lang ako na nahuli ko siya. binuksan ko uli ang bag ko at tiningnan kung may nakuha siya. sa kabutihang-palad, wala naman siyang nakuha. at ang kapal pa talaga ng mukha niya dahil ngumingisi pa siya sa'kin, eh halata namang kinabahan siya dahil nahuli ko siya. matapos ko siyang mahalata nagbayad na siya kaagad at sinabing bababa na lang siya sa philcoa. pagbaba sa philcoa, aba eh kasama pala niya yung isang lalaki nakaupo sa kabilang dulo. mandurukot na, mandurugas pa, dahil pang isang tao lang ang binayaran niya.

sa susunod talaga, masigurado ko lang na wala siyang panaksak isisigaw ko sa dyip: "hoy mamang pangit! 'yung kamay mo bakit nasa bag ko?!"

paalala sa mga nagkokomyut din katulad ko, pag sumasakay ng dyip:

- siguraduhing nakasara ang bag
- yakapin ang bag kung pwede.
- siguraduhing nakikita mo 'yung mga kamay ng mga katabi mo. kalimitan may dala-dala silang bag na walang laman at dun nila tinatago 'yung mga kamay nila. 'yung dati kong nawitness na pagdukot, 'yung mamang pangit may jacket at may mala-suitcase na bag. hindi talaga kita 'yung buong braso niya. 'yun pala sinaslash na niya 'yung bag ng katabi niya.
- at siyempre, magdasal. dahil naniniwala akong nakaligtas noong biyernes ng dahil sa Kanya.